អាជ្ញាធរខេត្តសៀមរាប ណែនាំស្ត្រីម្នាក់តាំងខ្លួនជាអ្នកមានបុណ្យ (ព្រះនាងឥន្ទ្រទេវី ) បញ្ឈប់សកម្មភាពដែលប៉ះពាល់តម្លៃសាសនា
សៀមរាប៖ ព្រះមន្ត្រីសង្ឃខេត្តសៀមរាបបានដឹកនាំក្រុមការងារចម្រុះ បានបញ្ជាឲ្យស្ត្រីម្នាក់បញ្ឈប់សកម្មភាពសាសនា ដែលចាត់ទុកថាដែលប៉ះពាល់ដល់តម្លៃសាសនា ប្រវត្តិសាស្ត្រ និង បេតិកភណ្ឌរបស់កម្ពុជា។
នៅថ្ងៃទី២ ខែកុម្ភៈ ឆ្នាំ២០២៥ ព្រះមន្ត្រីខេត្តសៀមរាប រួមជាមួយនឹងក្រុមការងារចម្រុះ បានជួបជាមួយស្ត្រីឈ្មោះ អេន ចរិយា បញ្ឈប់ការធ្វើពិធីសាសនាដែលមិនត្រឹមត្រូវនៅតាមទីសាធារណៈ និងជៀសវាងការចែករំលែកសកម្មភាពបែបនេះនៅលើប្រព័ន្ធផ្សព្វផ្សាយសង្គម។ មន្ត្រីបានណែនាំស្ត្រីរូបនោះឱ្យបញ្ឈប់សកម្មភាពដែលបំភ្លៃទំនៀមទម្លាប់សាសនា និងអាចបំភាន់សាធារណជន។
នាងក៏ត្រូវបានណែនាំឱ្យលុបរូបថត និងវីដេអូដែលបានបង្ហោះពីមុនទាំងអស់ ក៏ដូចជាជូនដំណឹងដល់មិត្តភ័ក្តិ និងអ្នកតាមដានរបស់នាង ឱ្យលុបខ្លឹមសារដែលបានចែករំលែកណាមួយ។
ករណីអះអាងរបស់នាងតាំងខ្លួនជាអ្នកមានបុណ្យ ដែលគេស្គាល់ថាជា «ព្រះនាងឥន្ទ្រទេវី» ដែលនាងបានឱ្យគោរពបូជា ថ្វាយបង្គំខ្លួន ក៏ត្រូវបានមន្ត្រីបានណែនាំនាងឱ្យបញ្ឈប់ការអះអាងទាំងនេះជាបន្ទាន់ ហើយចៀសវាងការធ្វើសកម្មភាពខុសនៅតាមប្រាសាទ ។
លើសពីនេះទៀត អេន ចរិយា ត្រូវបានណែនាំឲ្យឈប់ប្រើភាសារដែលគ្មានក្បួនខ្នាត និងទទួលស្គាល់ពីភាពត្រឹមត្រូវរបស់នាង។ ជាផ្នែកនៃដំណោះស្រាយ នាងត្រូវបានអាជ្ញាធរតម្រូវឱ្យថតវីដេអូសុំទោសជាសាធារណៈ ហើយប្តេជ្ញាថានឹងមិនប្រព្រឹត្តទង្វើទាំងនេះឡើងវិញទេ។
បន្ទាប់ពីកិច្ចប្រជុំនោះ ស្ត្រី អេន ចរិយា បានយល់ព្រមសន្យា អនុវត្តពេញលេញនូវលក្ខខណ្ឌទាំង ៥ ដែលអាជ្ញាធរបានកំណត់ដោយគ្មានលក្ខខណ្ឌ៕
